gulon ne muskurane ki saza paa.i to kya hoga
saza-e-gul pe ghunchon ko hansi aa.i to kya hoga
kahin bedad-e-gulchin se pareshan ho ke ghunchon ne
gulistan men na khilne ki qasam khaa.i to kya hoga
ye mere ashk mere raz-dan hain mujh se kahte hain
agar ho bhi ga.i bil-farz rusva.i to kya hoga
ye na-mumkin nahin mil jaa.en do ik jaam mange se
magar ye tishnagi phir bhi na miT paa.i to kya hoga
miri janib se raaz ifsha na hoga hai yaqin mujh ko
sar-e-mahfil vo chashm-e-naz sharma.i to kya hoga
abhi to azm-e-tark-e-bada-noshi hai ḳhuda jaane
kabhi tauba miri shishe se Takra.i to kya hoga
dua thi aa.en vo ya phir qaza aa.e vo kahte hain
kahin ab un se pahle hi qaza aa.i to kya hoga
abhi to hai shikayat ‘nur’ ko un ke taghaful se
magar ḳhud us ke jazbon men kami aa.i to kya hoga
Leave a Reply