Shikayat Ke Ewaz Hum Shukr Karte Hain Sanam Tere

shikayat ke evaz ham shukr karte hain sanam tere

maza dene lage kuchh sahte sahte ab sitam tere

na puchh ab mujh se tu meri umidon ki ye surat hai

ki hain bhi aur nahin bhi jis tarah pur-lutf kam tere

jidhar tu ne kiya rukh zer-e-pa mera tasavvur tha

na bavar ho to dekh ankhon men hain naqsh-e-qadam tere

lab-e-jan-bakhsh-e-janan kab ijazat denge marne ki

qayamat tak na dekhenge qadam khvab-e-adam tere

nahin rakhta koi sarmaya-e-aamal paas apne

bharose ke liye ashiq ke kaafi hain karam tere

tamanna ghair ki karna khilaf-e-rasm-e-ulfat hai

main ehsan-e-ajal kyuun luun nahin hain kya sitam tere

zara dekhen to kyuun kar dam nikal jaata hai sadmon se

firaq-e-dil-ruba aaj imtihan karte hain ham tere

mujhe bhule nahin pas-e-mohabbat us ko kahte hain

shab-e-vaslat men bhi hain duri-e-janan karam tere

hujum-e-be-khudi men ai ‘nasim’ ab pas-e-maani kya

ijazat de bura achchha likhen jo kuchh qalam tere

Leave a Comment