Gila Ai Dil Abhi Se Karta Hai

Mohammad Ali Jauhar

gila ai dil abhi se karta hai

ishq ka dam usi pe bharta hai

jaan deta hai aish-e-fani par

bas isi zindagi pe marta hai

rahat-e-javedan ko bhuul gaya

koi duniya men ye bhi karta hai

ishq ban kar jiye to ḳhaak jiye

zinda vo hai jo un pe marta hai

naam par us ke sab jo de baiTha

vahi ik hai jo naam karta hai

vaqf momin hai azmaish-e-ishq

is men puura vahi utarta hai

jis ko duniya ne na-murad kiya

vahi nakam kaam karta hai

hai musalman ki bas yahi pahchan

ki faqat ik ḳhuda se Darta hai

qaul-e-momin hai us ke fel ki sharh

vo jo kahta hai kar guzarta hai

mutma.in rah dila vo jan-e-jahan

vaada kar ke kahin mukarta hai

mere rang-e-kafan ki shoḳhi dekh

yuun hi ashiq tira sanvarta hai

aaj kar lo jo kar sako kal tak

kaun jiita hai kaun marta hai

qulzum-e-ishq men gira so gira

us ka Duuba kahin ubharta hai

is qadar ehtiyat ai sayyad

ki qafas men bhi par katarta hai

vahi din hai hamari iid ka din

jo tiri yaad men guzarta hai

mai-e-islam ka bhala ‘jauhar’

nashsha chaḌh kar kahin utarta hai