Goristan-e-Shahi

asman badal ka pahne ḳhirqa-e-derina hai

kuchh mukaddar sa jabin-e-mah ka aina hai

chandni phiki hai is nazzara-e-ḳhamosh men

sub.h-e-sadiq so rahi hai raat ki aghosh men

kis qadar ashjar ki hairat-faza hai ḳhamushi

barbat-e-qudrat ki dhimi si nava hai ḳhamushi

batin-e-har-zarra-e-alim sarapa dard hai

aur ḳhamoshi lab-e-hasti pe ah-e-sard hai

aah jaulan-gah-e-alam-gir yaani vo hisar

dosh par apne uthae saikḌon sadiyon ka baar

zindagi se tha kabhi maamur ab sunsan hai

ye ḳhamoshi us ke hangamon ka goristan hai

apne sukkan-e-kuhan ki ḳhaak ka dil-dada hai

koh ke sar par misal-e-pasban istada hai

abr ke rauzan se vo bala-e-bam-e-asman

nazir-e-alam hai najm-e-sabz-fam-e-asman

ḳhak-bazi vusat-e-duniya ka hai manzar use

dastan nakami-e-insan ki hai azbar use

hai azal se ye musafir su-e-manzil ja raha

asman se inqilabon ka tamasha dekhta

go sukun mumkin nahin aalam men aḳhtar ke liye

fatiha-ḳhvani ko ye Thahra hai dam bhar ke liye

rang-o-ab-e-zinagi se gul-ba-daman hai zamin

saikḌon ḳhun-gashta tahzibon ka madfan hai zamin

ḳhvab-gah shahon ki hai ye manzil-e-hasrat-faza

dida-e-ibrat ḳhiraj-e-ashk-e-gul-gun kar ada

hai to goristan magar ye ḳhak-e-gardun-paya hai

aah ik bargashta qismat qaum ka sarmaya hai

maqbaron ki shaan hairat-afrin hai is qadar

jumbish-e-mizhgan se hai chashm-e-tamasha ko hazar

kaifiyat aisi hai nakami ki is tasvir men

jo utar sakti nahin aina-e-tahrir men

sote hain ḳhamosh abadi ke hangamon se duur

muztarib rakhti thi jin ko arzu-e-na-subur

qabr ki zulmat men hai in aftabon ki chamak

jin ke darvazon pe rahta hai jabin-gustar falak

kya yahi hai in shahanshahon ki azmat ka maaal

jin ki tadbir-e-jahanbani se Darta tha zaval

rob-e-faghfuri ho duniya men ki shan-e-qaisari

Tal nahin sakti ghanim-e-maut ki yurish kabhi

badshahon ki bhi kisht-e-umr ka hasil hai gor

jada-e-azmat ki goya aḳhiri manzil hai gor

shorish-e-bazm-e-tarab kya uud ki taqrir kya

dardmandan-e-jahan ka nala-e-shab-gir kya

arsa-e-paikar men hangama-e-shamshir kya

ḳhuun ko garmane vaala nara-e-takbir kya

ab koi avaz soton ko jaga sakti nahin

sina-e-viran men jan-e-rafta aa sakti nahin

ruh-e-musht-e-ḳhak men zahmat-kash-e-bedad hai

kucha gard-e-nai hua jis dam nafas fariyad hai

zindagi insan ki hai manind-e-murgh-e-ḳhush-nava

shaḳh par baiTha koi dam chahchahaya ud gaya

aah kya aae riyaz-e-dahr men ham kya gae

zindagi ki shaḳh se phute khile murjha gae

maut har shaah o gada ke ḳhvab ki tabir hai

is sitamgar ka sitam insaf ki tasvir hai

silsila hasti ka hai ik bahr-e-na-paida-kanar

aur is dariya-e-be-payan ki maujen hain mazar

ai havas ḳhuun ro ki hai ye zindagi be-e’tibar

ye sharare ka tabassum ye ḳhas-e-atish-savar

chand jo surat-gar-e-hasti ka ik ejaaz hai

pahne simabi qaba mahv-e-ḳhiram-e-naz hai

charḳh-e-be-anjum ki dahshatnak vusat men magar

bekasi is ki koi dekhe zara vaqt-e-sahar

ik zara sa abr ka TukḌa hai jo mahtab tha

aḳhiri aansu Tapak jaane men ho jis ki fana

zindagi aqvam ki bhi hai yunhi be-e’tibar

rang-ha-e-rafta ki tasvir hai un ki bahar

is ziyan-ḳhane men koi millat-e-gardun-vaqar

rah nahin sakti abad tak bar-e-dosh-e-rozgar

is qadar qaumon ki barbadi se hai ḳhugar jahan

dekhta be-e’tinai se hai ye manzar jahan

ek surat par nahin rahta kisi shai ko qarar

zauq-e-jiddat se hai tarkib-e-mizaj-e-rozgar

hai nagin-e-dahr ki zinat hamesha nam-e-nau

madar-e-giti rahi abastan-e-aqvam-e-nau

hai hazaron qafilon se ashna ye rahguzar

chashm-e-koh-e-nur ne dekhe hain kitne tajvar

misr o babul miT gae baaqi nishan tak bhi nahin

daftar-e-hasti men un ki dastan tak bhi nahin

aa dabaya mehr-e-iran ko ajal ki shaam ne

azmat-e-yunan-o-ruma luut li ayyam ne

aah muslim bhi zamane se yunhi ruḳhsat hua

asman se abr-e-azari utha barsa gaya

hai rag-e-gul sub.h ke ashkon se moti ki laḌi

koi suraj ki kiran shabnam men hai uljhi hui

sina-e-dariya shuaon ke liye gahvara hai

kis qadar pyara lab-e-ju mehr ka nazzara hai

mahv-e-zinat hai sanobar juebar-e-aina hai

ghuncha-e-gul ke liye bad-e-bahar-e-aina hai

naara-zan rahti hai koyal baagh ke kashane men

chashm-e-insan se nihan patton ke uzlat-ḳhane men

aur bulbul mutrib-e-rangin nava-e-gulsitan

jis ke dam se zinda hai goya hava-e-gulsitan

ishq ke hangamon ki udti hui tasvir hai

ḳhama-e-qudrat ki kaisi shoḳh ye tahrir hai

baagh men ḳhamosh jalse gulsitan-zadon ke hain

vadi-e-kohsar men naare shaban-zadon ke hain

zindagi se ye purana ḳhak-dan maamur hai

maut men bhi zindagani ki tadap mastur hai

pattiyan phulon ki girti hain ḳhizan men is tarah

dast-e-tifl-e-ḳhufta se rangin khilaune jis tarah

is nashat-abad men go aish be-andaza hai

ek gham yaani gham-e-millat hamesha taaza hai

dil hamare yad-e-ahd-e-rafta se ḳhali nahin

apne shahon ko ye ummat bhulne vaali nahin

ashk-bari ke bahane hain ye ujḌe baam o dar

girya-e-paiham se biina hai hamari chashm-e-tar

dahr ko dete hain moti dida-e-giryan ke ham

aḳhiri badal hain ik guzre hue tufan ke ham

hain abhi sad-ha guhar is abr ki aghosh men

barq abhi baaqi hai is ke sina-e-ḳhamosh men

vadi-e-gul ḳhak-e-sahra ko bana sakta hai ye

ḳhvab se ummid-e-dahqan ko jaga sakta hai ye

ho chuka go qaum ki shan-e-jalali ka zuhur

hai magar baaqi abhi shan-e-jamali ka zuhur

Leave a Comment