zaḳhm kab ka tha dard uTha hai ab
us ke jaane ka dukh hua hai ab
meri ankhon men ḳhvab hain jis ke
us ki ankhon men rat-jaga hai ab
sunte aate hain qafila dil ka
rahguzar men kahin ruka hai ab
vo jo patthar ka tha musafir vo
shahr-e-afsun se aa gaya hai ab
jo miri ḳhvahishon ki manzil thi
us ke aane ka rasta hai ab
jis ko DhunDa tha main ne har janib
mere dil men kahin chhupa hai ab
kitne ḳhvabon men rang us ke hain
kitni ankhon se dekhta hai ab
kitne mausam hain sirf us ke liye
kitne chehron pe vo saja hai ab
kitni baton men us ki baten hain
kitne lahjon men bolta hai ab
jo tire shahr le ke aata tha
ruḳh vo dariya badal raha hai ab
aao dastak hi de ke dekhen to
vahi darvaza phir khula hai ab
is havale se zindagi meri
ghane jangal ka silsila hai ab
ek divana apni vahshat men
baat kahne ki kah gaya hai ab
Leave a Reply