Jo Naqsh miT Chuka Hai Banana to Hai Nahin

Nabeel Ahmad Nabeel

jo naqsh miT chuka hai banana to hai nahin

ujḌa dayar ham ne basana to hai nahin

ankhon ke diip raah men us ke jala.en kya

is ne palaT ke phir kabhi aana to hai nahin

lazim hai chalna ziist ki rahon pe bhi magar

jo gir paḌe kisi ne uThana to hai nahin

bhar ja.ega ye thoḌi si charagari ke ba.ad

taaza laga hai zaḳhm purana to hai nahin

kab tak vafa ke ma.ani batata rahun use

us bevafa ne raah pe aana to hai nahin

kuchh der Thahar jaa.e vo ḳhud hi ḳhuda kare

is baar koi aisa bahana to hai nahin

phir ḳhvahishon ke peḌ pe baiThenge dekhna

in panchhiyon ka koi Thikana to hai nahin

allah-re vafa.en ye ḳhuban-e-shahr ki

manzar dhuan dhuan hai suhana to hai nahin

mansub kar duun main jo tiri zindagi ke saath

yadon ka mere paas ḳhazana to hai nahin

kyuun phir kisi ke dil men mohabbat basa.en ham

jab ashiqi men naam kamana to hai nahin

qismat hai is ke samne ban jaa.e koi baat

vaise koi bhi baat banana to hai nahin

sochun to saare log nishane pe hain magar

dekhun koi kisi ka nishana to hai nahin

vo apna dard aap suna.e to baat hai

ham ne kisi ka dard sunana to hai nahin

ik dusre ki ghaat men baiThe hain sab magar

is vaqt ne kisi ko bachana to hai nahin

hai ta.iran-e-shauq ka maslak to ḳhamushi

hai maslahat ki shor machana to hai nahin

ishq-o-nazar ka da.imi rishta azal se hai

majnun ne shahr chhoḌ ke jaana to hai nahin

hasil kiya na is liye ta.amir ka hunar

ham ne naya jahan basana to hai nahin

kaise rasa.i ho miri us ke mizaj tak

ahval us ne dil ka sunana to hai nahin

mahrum ham na hon kabhi maan ki duaon se

nayab aisa koi ḳhazana to hai nahin

dekhega kaun chak-e-gareban ko ‘nabil’

farhad-o-qais ka ye zamana to hai nahin