Roz Kahte The Kabhi Ghair Ke Ghar Dekh Liya

roz kahte the kabhi ghair ke ghar dekh liya

aaj to aankh se ai rashk-e-qamar dekh liya

kaba-e-dil se mili manzil-e-maqsud ki raah

yaar ka ham ne usi kuche men ghar dekh liya

janib-e-ghair ishara jo hua jante hain

ham ne khud aankh se dekha ki idhar dekh liya

kaun sota hai kise hijr men niind aati hai

khvab men kis ne tumhen ek nazar dekh liya

jab kaha main ne nahin koi chalo mere ghar

khuub raste men idhar aur udhar dekh liya

bole chalne men nahin uzr mujhe kuchh lekin

khauf ye hai kisi mufsid ne agar dekh liya

aahon se aag laga denge dil-e-dushman men

chhup ke rahte hain jahan aap ka ghar dekh liya

bach gaya naqd-e-dil ab ke to nazar se us ki

aaega phir bhi agar chor ne ghar dekh liya

Leave a Comment