bagh-e-alam men hai be-rang bayan-e-vaiz
surat-e-barg-e-khizani hai zaban-e-vaiz
misr men bhi na ye firaun ka aalam hoga
dekhe masjid men koi shauqat-o-shan-e-vaiz
ek kanta sa nikal jaae hamare dil se
sansiyon se koi khinche jo zaban-e-vaiz
qulqul-e-shisha-e-mai se tire mai-kash saaqi
sun rahe hain khabar-e-raz-e-nihan-e-vaiz
haal maalum hua nar-o-jinan ka kyunkar
is qadar to nahin uncha hai makan-e-vaiz
nam-e-mai vo hai ki lab par jo kabhi aata hai
munh se bahar nikal aati hai zaban-e-vaiz
mai-kade valon se dabne lage masjid vaale
daur saaqi ka hai guzra vo zaman-e-vaiz
main bhi vo huun jo mire aage kabhi munh khole
kaat dalun abhi danton se zaban-e-vaiz
apne rindon ki main hu-haq ka huun sunne vaala
ya-ilahi na sunana sukhnan-e-vaiz
main pari-zadon ka ashiq huun to vo huron ka
mere saude se hai badh kar khafqan-e-vaiz
paae khum baith ke nashshe men vo baten kiije
log samjhen sar-e-mimbar hai bayan-e-vaiz
ai ‘saba’ khuld men jaun ki jahannam men jalun
na suna hai na sununga main bayan-e-vaiz