Mohsin Aftab Kelapuri
kuchh naya kaam na.e taur se karne ke liye
log mauqa.a hi nahin dete sudharne ke liye
jaao ja kar ke gharibon ke dilon men jhanko
kitni bechain tamanna.en hain marne ke liye
us pe marte ho to phir duniya ki parva kaisi
ishq hota hai miyan had se guzarne ke liye
koi asani se fankar nahin banta hai
muddaten chahiye ik fan ko nikharne ke liye
munh uTha kar ke phir aa.i hai ye tauba tauba
shab juda.i ki mire ghar men Thaharne ke liye
kisi doshiza ki zulfen ye nahin qismat hai
vaqt lagta hai bahut us ko sanvarne ke liye
aaj is baat ka ehsas hua hai mujh ko
ḳhvab ‘mohsin’ the mire sirf bikharne ke liye
Leave a Reply