mil kar juda hue to na soya karenge ham
ik dusre ki yaad men roya karenge ham
aansu jhalak jhalak ke sata.enge raat bhar
moti palak palak men piroya karenge ham
jab duriyon ki aag dilon ko jala.egi
jismon ko chandni men bhigoya karenge ham
bin kar har ek bazm ka mauzu-e-guftugu
sheron men tere gham ko samoya karenge ham
majburiyon ke zahr se kar lenge ḳhud-kushi
ye buzdili ka jurm bhi goya karenge ham
dil jal raha hai zard shajar dekh dekh kar
ab chahaton ke biij na boya karenge ham
gar de gaya dagha hamen tufan bhi ‘qatil’
sahil pe kashtiyon ko Duboya karenge ham
Leave a Reply