Ateeq Anzar
kahaniyan ḳhamosh hain paheliyan udaas hain
hansi-ḳhushi ke din ga.e haveliyan udaas hain
kabhi kabhi to baagh men chala aa ghumta hua
ki TuTne ki chaah men chameliyan udaas hain
phalon ke bojh se lachak ga.i hain Daliyan magar
abhi talak gulab si hatheliyan udaas hain
ye chandni bahar ye kali ye jhiil ye faza
tire baghair teri sab saheliyan udaas hain
jhulas gaya hai peḌ ye hina ka jab se dhuup men
hamare gaanv ki na.i-naveliyan udaas hain
Leave a Reply