ada-jafarey

Kya Jaaniye Kis Baat Pe Maghrur Rahi Hun

kya janiye kis baat pe maghrur rahi huun

kahne ko to jis raah chalaya hai chali huun

tum paas nahin ho to ajab haal hai dil ka

yuun jaise main kuchh rakh ke kahin bhuul gai huun

phulon ke katoron se chhalak padti hai shabnam

hansne ko tire pichhe bhi sau baar hansi huun

tere liye taqdir miri jumbish-e-abru

aur main tira ima-e-nazar dekh rahi huun

sadiyon se mire paanv tale jannat-e-insan

main jannat-e-insan ka pata puchh rahi huun

dil ko to ye kahte hain ki bas qatra-e-khun hai

kis aas pe ai sang-e-sar-e-rah chali huun

jis haath ki taqdis ne gulshan ko sanvara

us haath ki taqdir pe azurda rahi huun

qismat ke khilaune hain ujala ki andhera

dil shoala-talab tha so bahar-hal jali huun

More Poems

Leave a Comment