main bichhaḌ kar tujh se teri ruuh ke paikar men huun
tu miri tasvir hai main tere pas-manzar men huun
apna markaz DhunDta huun da.eron men kho ke main
kitne janmon se main ik mahdud se chakkar men huun
ḳhud hi dastak de raha huun apne dar par der se
ghar se bahar rah ke bhi jaise main apne ghar men huun
main vo aazar huun jise barson rahi apni talash
ḳhud hi murat ban ke poshida har ik patthar men huun
dekhne vaale mujhe meri nazar se dekh le
main tiri nazron men huun aur main hi har manzar men huun
gunjta huun apne andar aur kho jaata huun main
ik sada ban kar ana ke gumbad-e-be-dar men huun
main kabhi ik jhiil tha phaile hue sahraon men
aaj main ik pyaas ka sahra huun aur sagar men huun
maut ko ‘azad’ ye irfan dena hai mujhe
kaTti hai mujh ko jis se vo main us ḳhanjar men huun
Leave a Reply