Bujhti Shama Ki Surat Kyun Afsurda khaDe Ho khiDki Mein

Rafique Khayal

bujhti sham.a ki surat kyuun afsurda khaḌe ho khiḌki men

dekho shaam hai kis darja dilkash is dhuup ki vardi men

vahm-o-guman ke sahraon men phuul khile tiri yadon ke

aur charaghan duur tilak hai sanson ki is vaadi men

qahr-o-ghazab ke mimbar par hathon men liye kashkol-e-vafa

jhank raha tha suraj bhi kal ghaur se ek surahi men

duur khaḌa ho kar main is liye pahron dekhta rahta huun

qaid bahut si yaden hain miri is viran haveli men

tahon ki pyaas bhi sat.h par ab saaf dikha.i deti hai

DhunD rahe hain jaane kya ye badal niili chhatri men

ek hai andesha mujh ko kahin mere mar jaane ke ba.ad

bech na den mere ghar vaale miri qimti ghazlen raddi men

rang aur ḳhushbu ki manind hai mera sarapa bhi sahib

qaid rakhega aḳhir kab tak vaqt mujhe yuun muTThi men

bahr-e-mohabbat ke sahil ki sair bahut kar li ham ne

aao zara ab ham bhi dekhen baiTh ke pyaar ki kashti men

hirs-o-havas ke saare pujari ek jagah hain aaj jama.a

vaqt ki shaḳh pe shayad koi phuul khila hai jaldi men