bani-e-jaur-o-jafa hain sitam-ijad hain sab
rahat-e-jan koi dilbar nahin jallad hain sab
kabhi tuuba tire qamat se na hoga baala
baten kahne ki ye ai ghairat-e-shamshad hain sab
mizha o abru o chashm o nigah o ghamza o naaz
haq jo puchho to miri jaan ke jallad hain sab
sarv ko dekh ke kahta hai dil-e-basta-e-zulf
ham giraftar hain is baagh men azad hain sab
kuchh hai behuda o naqis to ‘amanat’ ka kalam
yuun to kahne ko fan-e-sher men ustad hain sab
Leave a Reply