Poet
use kamyabi ki hajat nahin
mohabbat hai koi tijarat nahin
ḳhatavar shukr-o-shikayat nahin
use baat karne ki aadat nahin
main rahta huun us ke ḳhayalon men gum
mujhe saans lene ki fursat nahin
vo hai rang ḳhushbu dhanak chandni
use zeb-o-zinat ki hajat nahin
sitamgar vo mujh par ho jab mehrban
mubarak koi aisi saa.at nahin
uTha.un main naaz us gul-andam ke
mire vaste ye sa.adat nahin
ḳhushi ke ta.aqub men hai gham yahan
ye duniya jahannum hai jannat nahin
qarin-e-haqiqat hai ye qaul bhi
zamane men ab kuchh sharafat nahin
main is ko mohabbat ka tohfa kahun
agar tum ko mujh se shikayat nahin
main karta huun jin sathiyon se gurez
mujhe un se koi shikayat nahin
mujhe hasidon se hai shikva magar
ḳhuda vaste ki adavat nahin
tiri baat sachchi hai vaa.iz magar
bayan men tire kuchh latafat nahin
jama.at hai husn-e-ibadat magar
jo dil se na ho vo ibadat nahin
hakimana ulfat se arasta
shari.at se haT kar tariqat nahin
jahan men vahi ab hai be-iḳhtiyar
jise jhuuT bakne ki aadat nahin
mohabbat men hai raaz raz-e-hayat
mohabbat se baḌh kar ibadat nahin
Leave a Reply