had se guzar gaya gham-e-dauran kabhi kabhi
daman men ashk ho ga.e ghaltan kabhi kabhi
jab zo.am-e-aql-o-hosh se kuchh bhi na ban saka
kaam aa ga.i hai jur.at-e-rindan kabhi kabhi
aate hain inqalab kabhi bahar-e-inqalab
kashti ko paar karte hain tufan kabhi kabhi
sar de diya diya na magar ghair-e-haq ka saath
duniya men aa.e aise bhi insan kabhi kabhi
kya kalba-e-hazin men nahin raunaq-e-hayat
hota hai dil yahan bhi ghazal-ḳhvan kabhi kabhi
ghabra ke zindagi se talash-e-qarar men
chhani hai ḳhak-e-dasht-o-bayaban kabhi kabhi
har chand hai dakan se mujhe pyaar ‘tahira’
aati hai yaad mahfil-e-tahran kabhi kabhi
Leave a Reply