muskurane ki ada mujh ko sikhati hai ghazal
koi mushkil ho mira saath nibhati hai ghazal
dastan husn-o-mohabbat ki sunati hai ghazal
ham-nava apna zamane ko banati hai ghazal
niind uḌ jaati hai raton ko jo ankhon se kabhi
apni aghosh-e-mohabbat men sulati hai ghazal
gham se azad bashar hota hai sunte hi ise
ahl-e-mahfil pe asar aisa jamati hai ghazal
kaise kah duun ki hai mahdud ghazal ki duniya
shaan urdu ki zamane men baḌhati hai ghazal
phailta hai rah-e-hasti men andhera to ‘kamal’
fikr-o-ehsas ki ik sham.a jalati hai ghazal
Leave a Reply