Hari Chand Akhtar
ramz-ashna mile ka.i ahl-e-nazar mile
phir bhi ye justuju rahi koi bashar mile
aadil bhi ho rahim bhi ho karsaz bhi
sab kuchh to ho magar zara ham se nazar mile
inkar-e-sajda hai yahan kis ru-siyah ko
shayan-e-sajda bhi to magar koi dar mile
ye hai kamal-e-jahl ki me.araj-e-agahi
har lamha justuju hai kuchh apni ḳhabar mile
aish-e-gurez-pa ka tasavvur bhi miT gaya
gham aise mustaqil mile aur is qadar mile
Leave a Reply