Udas Sham Ki Tanhaiyon Mein Jalta Hua

udaas shaam kī tanhā.iyoñ meñ jaltā huā

vo kaash aa.e kabhī mere paas chaltā huā

shab-e-firāq ne mismār saare ḳhvāb kiye

koī to muzhda sunā.e ye din nikaltā huā

hai kyā ajab ki kabhī chāñd bhī añdheroñ meñ

sukūñ talāsh kare zāviye badaltā huā

mire masīhā ḳhudā aaj terā rakkhe bharam

nazar mujhe nahīñ aatā ye jī bahaltā huā

maiñ raushnī ke nagar meñ paḌāv ḳhaak karūñ

Darā rahā hai mujhe apnā saaya Dhaltā huā

Leave a Comment