qatre men bhi chhupe hain bhanvar raqs kijiye
qaid-e-sadaf men misl-e-guhar raqs kijiye
kiije fasurdagi-e-tabi.at ka kuchh ilaaj
is ḳhak-dan men misl-e-sharar raqs kijiye
ik naujavan ne aaj buzurgon se kah diya
hoti nahin jo umr basar raqs kijiye
suuje hain paanv aankh se hi taal dijiye
uljha hua hai tar-e-nazar raqs kijiye
gardish men ik sitara-e-be-chara hi nahin
hai asman bhi zer-o-zabar raqs kijiye
guzre jo mah-o-sal to lai bhi badal ga.i
ab ke baras ba-rang-e-digar raqs kijiye
fariyad kijiye na koi zulm Dha.iye
ik vahm hai shikast-o-zafar raqs kijiye
is ta.ife men ek kami hai to aap ki
ai dushmanan-e-ilm-o-hunar raqs kijiye
fashion hai aj-kal ka madari ki DugDugi
dil chahe ya na chahe magar raqs kijiye
apni to jhonpaḌi men thirakta nahin charagh
ja kar kisi raqib ke ghar raqs kijiye
‘sayyad’ na radio na cinema hai aap ka
apne hi giit ga.iye aur raqs kijiye
Leave a Reply