kuchh aise log bhi duniya men paa.e jaate hain
jahan bhi jaa.en diye vo jala.e jaate hain
ye azma.ishen yuun hi ata nahin hotin
jo log ḳhaas hon vo azma.e jaate hain
hamen husain se paighambaron se nisbat hai
ham is liye bhi bahut dil dukha.e jaate hain
vo shaḳhs surat-e-ḳhurshid jab nikalta hai
to rang-o-nur men ham bhi naha.e jaate hain
use bhi pyaar hai un se jo dil-shikasta hon
so us ki bazm men ham bhi bula.e jaate hain
main apne dil se pareshan huun kidhar ja.un
jo bevafa the use yaad aa.e jaate hain
to kul mila ke mujhe baat ye samajh aa.i
jo nek log hon aksar sata.e jaate hain
dua salam na hadd-e-adab na ijz-o-ḳhulus
ye mere shahr men ab kaun aa.e jaate hain
ajiib log hain sha.ir bhi ye ḳhuda jaane
koi sune na sune ye suna.e jaate hain
mira yaqin hai ye ḳhamushi ye gahra sukut
ye log ḳhud nahin aate ye laa.e jaate hain
Leave a Reply