Yun to Hai Dahr Mein Har Dard Ka Har Gham Ka Ilaj

Aziz Warsi

yuun to hai dahr men har dard ka har gham ka ilaaj

kaash ho jaa.e miri kahish-e-paiham ka ilaaj

aman-e-sahil hai jo tughyani-e-barham ka ilaaj

phir to mushkil nahin insan ke kisi gham ka ilaaj

zindagi chhinne vaale tiri qudrat ki qasam

tere hathon men tha bimar shab-e-gham ka ilaaj

haan vahi phuul jo shabnam ki badaulat mahke

un se bhi ho na saka girya-e-shabnam ka ilaaj

jab sataya gham-e-dauran ne to itni pi li

ek aalam se kya dusre aalam ka ilaaj

piine vaalo abhi kuchh der mere saath raho

aap kar sakte hain kuchh dida-e-pur-nam ka ilaaj

ab to ehsas mujhe bhi yahi hota hai ‘aziz’

mere ash.ar men muzmar hai mire gham ka ilaaj