afsos kya jo ham bhi tumhare nahin rahe
tum bhi kisi ke ho ke hamare nahin rahe
ab shikva-e-fareb-e-mohabbat na kijiye
ham bhi kisi ki aankh ke taare nahin rahe
ye husn-e-ittifaq hai phir mil ga.e hain vo
ye aur baat hai ki hamare nahin rahe
tum bhi ta.alluqat ki had se guzar ga.e
ham bhi kisi ko jaan se pyare nahin rahe
jab se chale ga.e vo baharon ko luuT kar
husn-e-bahar ke vo nazare nahin rahe
ham jin ke ho ga.e the zamane ko chhoḌ kar
qismat to dekhiye vo hamare nahin rahe
sher-o-suḳhan ki mahfilon ki raunaqen ga.iin
chhajje nahin rahe vo chaubare nahin rahe
meri murad ka hai safina bhi na-murad
tufan ruk gaya to kinare nahin rahe
vo chashm-e-sharmgin ki fusun-kariyan ga.iin
vo chashm-e-surmagin ke ishare nahin rahe
shalon men ishq ke bhi vo chingariyan nahin
bas aag rah ga.i hai sharare nahin rahe
jaate hue vo sabr-o-sukun saath le gaya
bahte hue sukun ke dhare nahin rahe
rana.i-e-jamal-e-gul-afshan ki ḳhair ho
ab husn-e-dilruba ke nazare nahin rahe
dil ko tha ibtida-e-mohabbat men jin pe naaz
vo apni zindagi ke sahare nahin rahe
be-nur kar gaya koi duniya ko ‘soz’ ki
vo chand chhup gaya vo sitare nahin rahe
Leave a Reply