Rehana Qamar
kabhi suraj hai kabhi zohra-jamalon jaisa
kyuun vo lagta hai mujhe meri misalon jaisa
har tarah se vo bahut achchha hai lekin us ko
dekhna chahti huun apne ḳhayalon jaisa
chahti huun ki karun us se mohabbat khul kar
lekin anjam na ho chahne valon jaisa
kis tarah maan luun main us ki nisabi baten
us ka mauqif hai kitabon ke havalon jaisa
meri zid hai use hal kar ke rahungi main bhi
vo jo lagta hai riyazi ke savalon jaisa
aaj ke din bhi ghaTa khul ke na barse shayad
aaj ka din bhi hai vahshat men ghazalon jaisa
ai mohabbat men mujhe chand sa kahne vaale
mujh ‘qamar’ ko na samajh meri misalon jaisa
Leave a Reply