Qamar Jalalvi
bagh-e-alam men rahe shadi-o-matam ki tarah
phuul ki tarah hanse ro diye shabnam ki tarah
shikva karte ho ḳhushi tum se mana.i na ga.i
ham se gham bhi to manaya na gaya gham ki tarah
roz mahfil se uThate ho to dil dukhta hai
ab nikalvao to phir hazrat-e-adam ki tarah
laakh ham rind sahi hazrat-e-va.iz lekin
aaj tak ham ne na pi qibla-e-alam ki tarah
tere andaz-e-jarahat ke nisar ai qatil
ḳhuun zaḳhmon pe nazar aata hai marham ki tarah
ḳhauf dil se na gaya sub.h ke hone ka ‘qamar’
vasl ki raat guzari hai shab-e-gham ki tarah
Leave a Reply