Bagh-E-Alam Mein Rahe Shadi-O-Matam Ki Tarah

bāġh-e-ālam meñ rahe shādī-o-mātam kī tarah

phuul kī tarah hañse ro diye shabnam kī tarah

shikva karte ho ḳhushī tum se manā.ī na ga.ī

ham se ġham bhī to manāyā na gayā ġham kī tarah

roz mahfil se uThāte ho to dil dukhtā hai

ab nikalvāo to phir hazrat-e-ādam kī tarah

laakh ham riñd sahī hazrat-e-vā.iz lekin

aaj tak ham ne na pī qibla-e-ālam kī tarah

tere andāz-e-jarāhat ke nisār ai qātil

ḳhuun zaḳhmoñ pe nazar aatā hai marham kī tarah

ḳhauf dil se na gayā sub.h ke hone kā ‘qamar’

vasl kī raat guzārī hai shab-e-ġham kī tarah

Leave a Comment