Hum Barq-O-Sharar Ko Kabhi Khatir Mein Na Lae

ham barq-o-sharar ko kabhi khatir men na laae

us fitna-e-dauran ko magar dekh na paae

go qatre men dariyaon ka tufan samae

par shauq ki rudad kab alfaz men aae

zulfon ko diya hai rukh-e-zeba ne ajab rang

jalvon se tire aur bhi raushan hue saae

ye ishq ke shoale bhi ajab chizen hain yaani

jo aag lagae vahi khud aag bujhae

Dhalti hai vo mai ik tire paimane men saaqi

masti ko bhi jo hosh ke adab sikhae

teri hi nigahon ka tasarruf tha ki ham ne

ranai-e-afkar ke eajaz dikhae

jis dil pe kisi ki nigah-e-lutf padi thi

baithe hain ‘surur’ us ko kaleje se lagae

Leave a Comment