main tedhi pasli ka gustakh janam huun
jis ke halqon men bad-tahzib chikhon ka hujum
baghair ittilaa diye
naqqara-e-be-aman ka raag alapta hai
phunkta hai aankh aankh men
dhuan adh-jale taalluqat ka
mujhe pathrile ehsas ke panghodon men khilaya gaya
sikhai gai be-tartib zindagi ki bandar-bant
qallash logon ke darmiyan
phenka gaya be-dhyani se
kaun jaane
zindagi ki utha-patakh main kitne abgine chakna-chur hue
kis ne maqruz dastaron pe utha rakha hai
pairon men rondi hui
jannat ka azaab
Leave a Reply