ishq se bach ke kidhar jaenge ham
hai ye maujud jidhar jaenge ham
tan ke bas rakhiye qabza par haath
dekhiye muft men dar jaenge ham
teri dahliz par apne sar ko
ek din kaat ke dhar jaenge ham
vo ye kahte hain na de dil ham ko
dekh lete hi mukar jaenge ham
mana karte ho abas yaaro aaj
us ke ghar jaenge par jaenge ham
dil ki leni hai khabar ham ko zarur
aaj to phir bhi udhar jaenge ham
dam kahin lenge na phir ta-ba-adam
tere kucha se agar jaenge ham
tu na guzrega jafa se zalim
jaan se apni guzar jaenge ham
ziist baaqi hai to apna ‘rangin’
naam is ishq men kar jaenge ham