Sohail Akhtar
jab koi alam-e-shuhud na tha
main bhi ik ḳhvab tha vajud na tha
apni taḳhliq se hua mahdud
varna main janta hudud na tha
mujh men bhi lau thi aag thi pahle
mera sarmaya sirf duud na tha
jaane us ne mujhe ḳharida kyuun
main ziyan hi ziyan tha suud na tha
tarz-e-iz.har ne kiya maḳhsus
ḳhaas ash.ar ka varud na tha
ik asiri yahan thi shart-e-shanaḳht
aur main banda-e-quyud na tha
tujh se rangini-e-jahan hai ‘suhail’
pahle ye rang-e-hast-o-bud na tha
Leave a Reply