shaam ke asar giile hain bahut
phir miri a.ankhon men tiile hain bahut
tum se milne ka bahana tak nahin
aur bichhaḌ jaane ke hiile hain bahut
kisht-e-jan ko ḳhushk-sali kha ga.i
mausamon ke rang piile hain bahut
barf pighli hai faraz-e-arsh se
asman ke rang niile hain bahut
bel ki surat hain ham phaile hue
ham faqiron ke vasile hain bahut
main bhi apni zaat men abad huun
mere andar bhi qabile hain bahut
log basti ke bhi hain shirin-sifat
mere naghme bhi rasile hain bahut
‘qais’ ham jogi hain apne shahr ke
naag to ham ne bhi kiile hain bahut
Leave a Reply