qalb-o-nazar ka sukun aur kahan dosto
ku-e-butan dosto ku-e-butan dosto
mera hi dil hai ki main phirta huun yuun ḳhanda-zan
kam nahin pardes men dil ka ziyan dosto
jin men ḳhulus-e-vafa aur na shu.ur-e-sitam
mujh ko biThaya hai ye la ke kahan dosto
chaar ghaḌi raat hai aao ki hans bol len
jaane sahar tak ho phir kaun kahan dosto
rabt-e-marasim ke ba.ad tark-e-ta.alluq ghalat
aag bujhane se bhi hoga dhuan dosto
laakh chhupo saya-e-gesu-e-shab-rang men
mil nahin sakti magar gham se amaan dosto
sha.ir-e-‘arshad’ huun main sha.er-e-fitrat huun main
miT nahin sakta mira nam-o-nishan dosto
Leave a Reply