Bedam Shah Warsi

Shadi-O-Alam Sab Se Hasil Hai Subukdoshi

shadi-o-alam sab se hasil hai subukdoshi

sau hosh mire sadqe tujh par miri be-hoshi

gum hone ko pa jaana kahte hain mohabbat men

aur yaad ka rakkha hai yaan naam faramoshi

kal ghair ke dhoke men vo iid mile ham se

kholi bhi to dushman ne taqdir-e-ham-aghoshi

vo qulqul-e-mina men charche miri tauba ke

aur shisha-o-saghar ki mai-khane men sargoshi

ham ranj bhi paane par mamnun hi hote hain

ham se to nahin mumkin ehsan-framoshi

hosh aata hai phir mujh ko phir hosh mujhe aaya

dena nigah-e-saqi ik saghar-e-be-hoshi

kal arsa-e-mahshar men jab aib khulen mere

rahmat tiri phaila de daman-e-khata-poshi

milte hi nazar tujh se mastana hua ‘bedam’

saaqi tiri ankhen hain ya saghar-e-be-hoshi

More Poems

Leave a Comment