Zakia Ghazal
malal dil men kisi dard ka nahin rakhna
koi bura jo kahe dil bura nahin rakhna
ye dushmani to bahut fasle baḌha degi
hamare baa’d kisi se gila nahin rakhna
hamare dost hamen bad-guman kar denge
ab iltifat bahut barmala nahin rakhna
ye nasl-e-nau to hamin se javaz mangegi
so iḳhtilaf ko had se siva nahin rakhna
tumhare paas faqat aaj hai mire logo
kisi bhi kaam ko kal pe uTha nahin rakhna
ham ajizi se milen tarbiyat hamari hai
unhen ghurur salam-o-dua nahin rakhna
milen zarur magar faisle ke baa’d ‘ghazal’
ki rabt aap se rakhna hai ya nahin rakhna
Leave a Reply