raushni le kar andheri raat men nikla na kar
raat parde ke liye hai ḳhud ko be-parda na kar
dahr ka phailav bhi nuqta nazar aane lage
sher kahta hai to kah itna magar socha na kar
ek din tu bhi kisi taare se Takra ja.ega
dost mere raat ki galiyon men yuun ghuma na kar
chand bhi utra tha pichhli shab isi talab men
kyuun chamakta hai naha dho kar badan ponchha na kar
aa.ina chamka.e rakh sab kuchh nazar aa ja.ega
jis ki chahat ho use ḳhud se juda samjha na kar
dopahar ki lahr chehre ko jhulas degi ‘ḳhalil’
ghar ki ThanDak chhoḌ kar peḌon tale baiTha na kar
Leave a Reply