Bakul Dev
hamen raas aani hai rahon ki gaThri
rakho paas apni panahon ki gaThri
badal jaa.e kaash is hasin marhale par
hamari tumhari gunahon ki gaThri
mohabbat ki rahen thiin hamvar lekin
hamin Dho na paa.e nibahon ki gaThri
takalluf ke saman bikhre the baham
so bandhe rahe ham bhi banhon ki gaThri
ujale ke hain in dinon daam unche
chalo luuT len ru-siyahon ki gaThri
dhari rah ga.i munsif-e-dil ke aage
bayanon ki gaThri gavahon ki gaThri
na ugli hi jaa.e na nigale bane hai
gale men phansi ek aahon ki gaThri
ye sukhi hui fasl-e-gham ji uThegi
agar khul ga.i in nigahon ki gaThri
uThengi kisi roz sailab ban kar
ye abadiyan hain tabahon ki gaThri
miri sidhi saadi si baton pe mat ja
miri zaat hai kaj-kulahon ki gaThri
Leave a Reply