ham ne qissa bahut kaha dil ka
na suna tum ne majra dil ka
apne matlab ki sab hi kahte hain
hai nahin koi ashna dil ka
ishq men aisi khinchi rusvai
ho gaya shor ja baja dil ka
is qadar be-havas rahta hai
jaise kuchh koi le gaya dil ka
ek bose pe bechte the ham
tu ne sauda na kuchh kiya dil ka
tere milne se faeda kya hai
na ho hasil jo muddaa dil ka
kyuun diya ‘asif’ us sitamgar ko
aap tu muddai hua dil ka
Leave a Reply