Razi Raziuddin
shab zara der se guzregi na ghabra ai dil
sub.h ḳhud hogi numudar Thahar ja ai dil
kho ga.i gesu-e-janan ki ghani chhanv kahan
har taraf dhuup ka tapta hua sahra ai dil
kucha-e-yar men aa.e the kin ummidon se
luT ga.i aa ke yahan shauq ki duniya ai dil
kaisi shorish si bapa hai kabhi chal kar dekhen
qatl-gahon men hai ye kaisa tamasha ai dil
mausam-e-gul hai ye kaisa ki chaman hairan hai
har kali phuul ka dil jaise ki mera ai dil
dushman-e-jan hain sabhi saare ke saare qatil
tu bhi is bhiiḌ men kuchh der Thahar ja ai dil
Leave a Reply