be-hisi insan ka hasil na ho
dosti ho ret ka sahil na ho
main to bas ye chahta huun vasl bhi
do dilon ke darmiyan haael na ho
mujh ko tanha chhodne vaale bata
kya karun jab dil tiri mahfil na ho
kis tarah meri zaban tak aaega
harf jo sachchai ka hamil na ho
ye zamana chahta hai aaj bhi
khun-e-dil tahrir men shamil na ho
jis taraf le ja rahi hai zindagi
us taraf bhi kucha-e-qatil na ho
adamiyyat ke liye ye shart hai
aadmi kuchh ho magar saail na ho
Leave a Reply