Main Mil Ka Patthar Na Dagar Dekh Raha Hun

maiñ miil kā patthar na Dagar dekh rahā huuñ

pairoñ pe jamī gard-e-safar dekh rahā huuñ

tārīkī nazar aatī hai kuchh logoñ ko lekin

maiñ haml meñ is shab ke sahar dekh rahā huuñ

ye amn kī dhartī hai magar aaj yahāñ par

takrār kā aalam hai jidhar dekh rahā huuñ

vāqif nahīñ hamsā.e ke ahvāl se lekin

T-V pe zamāne kī ḳhabar dekh rahā huuñ

uḌne kī havas meñ na kahīñ jaan gañvā de

chyūñTī ke nikal aa.e haiñ par dekh rahā huuñ

peshānī-e-hākim pe shikan aa ga.ī ‘anjum’

mahkūm kī aahoñ kā asar dekh rahā huuñ

Leave a Comment