Hum Ko Hawas-E-Jalwa-Gah-E-Tur Nahin Hai

ham ko havas-e-jalva-gah-e-tur nahin hai

us husn ki kya qadr jo mastur nahin hai

afsana-e-majnun se nahin kam mira qissa

is baat ko jaane do ki mashhur nahin hai

kaabe ko chale jaaen dar-e-dost se uth kar

par us ka satana hamen manzur nahin hai

vo meri ayadat ko zarur aengi hamdam

kahte hain ki makkar hai ranjur nahin hai

khilne se bhala us ke dukhe kyuun dil-e-bulbul

hai ghuncha-e-gul zakhm ka angur nahin hai

davat se musakhkhar ho na taaat se mayassar

huun jis pe fida vo pari-o-hur nahin hai

mushrik kahe ashiq ko jo le naam khuda ka

sach kahte ho us shokh se kuchh duur nahin hai

ho raat to jiite rahen ummid-e-sahar par

ye roz-e-siyah hi shab-e-dijur nahin hai

‘nazim’ main padhata use ‘ghalib’ ke qasaed

afsos ki ‘khaqani’-e-maghfur nahin hai

Leave a Comment