poet

Har Dua Hogi Be-Asar Na Samajh

har dua hogi be-asar na samajh

aaj nahaq hai aankh tar na samajh

ziist mushkil sahi magar ai dost

maut asan rahguzar na samajh

hausla rakh tu rahrav-e-manzil

thak ke raste ko apna ghar na samajh

pujta huun main pattharon ke sanam

mere dil men hai koi Dar na samajh

ja-ba-ja sun tu meri sargoshi

main faza men huun muntashir na samajh

jin charaghon ki lau bahut kam hai

un charaghon ko mo’atabar na samajh

main tahi-dast muflis-o-nadar

tu mujhe dast-e-be-hunar na samajh

main huun qaail tiri parastish ka

tujh se mangunga main guhar na samajh

teri dastak ka muntazir ‘anjum’

shahr men hoga koi dar na samajh

More Poems

Leave a Comment