munawwar-rana

Achchhi Se Achchhi Aab-O-Hawa Ke Baghair Bhi

achchhi se achchhi ab-o-hava ke baghair bhi

zinda hain kitne log dava ke baghair bhi

sanson ka karobar badan ki zaruraten

sab kuchh to chal raha hai dua ke baghair bhi

barson se is makan men rahte hain chand log

ik dusre ke saath vafa ke baghair bhi

ab zindagi ka koi bharosa nahin raha

marne lage hain log qaza ke baghair bhi

ham be-qusur log bhi dilchasp log hain

sharminda ho rahe hain khata ke baghair bhi

charagari batae agar kuchh ilaaj hai

dil tutne lage hain sada ke baghair bhi

More Poems

Leave a Comment