mire dil ki ḳhata.en bhi qayamat hain qayamat hain
ḳhataon par saza.en bhi qayamat hain qayamat hain
kahan se main kahan aaya kahan se dil kahan pahuncha
mohabbat ki hava.en bhi qayamat hain qayamat hain
nahin ma.alum kya roz-e-jaza pesh aane vaala hai
qayamat men saza.en bhi qayamat hain qayamat hain
koi jiita hai un se aur marta hai koi un par
lagavaT ki ada.en bhi qayamat hain qayamat hain
ilaj-e-ishq se ai chara-gar taklif baḌhti hai
mire haq men dava.en bhi qayamat hain qayamat hain
yahi kahta hai sun sun kar vo ahl-e-gham ke nalon ko
faqiron ki sada.en bhi qayamat hain qayamat hain
idhar meri tabi.at bhi nahin rukti nahin thamti
udhar un ki ada.en bhi qayamat hain qayamat hain
chalo rindon baḌho aao piyo phir fasl-e-gul aa.i
ye saaqi ki sada.en bhi qayamat hain qayamat hain
kahin aisa na ho baḌh jaa.e pahle se junun mera
ghaTa.en bhi hava.en bhi qayamat hain qayamat hain
qayamat ke jo munkir hon vo dekhen meri a.ankhon se
hasinon ki ada.en bhi qayamat hain qayamat hain
dam-e-be-dad vo ai ‘nuh’ dil men ye samajh rakkhe
hamari bad-dua.en bhi qayamat hain qayamat hain
Leave a Reply