Asar Lakhnavi
chupke se naam le ke tumhara kabhi kabhi
dil Dubne laga to ubhara kabhi kabhi
har-chand ashk-e-yas jab umDe to pi ga.e
chamka falak pe ek sitara kabhi kabhi
main ne to honT si liye is dil ko kya karun
be-iḳhtiyar tum ko pukara kabhi kabhi
zahr-e-alam ki aur baḌhane ko talḳhiyan
be-mehriyon ke saath mudara kabhi kabhi
rusva.iyon se duur nahin be-qarariyan
dil ko ho kaash sabr ka yaara kabhi kabhi
qatre se ek mauj ye kahti nikal ga.i
sahil se maslahat hai kinara kabhi kabhi
ai shahid-e-jamal koi shakl hai ki ho
teri nazar se tera nazara kabhi kabhi
hangam-e-girya aah se nadan ‘asar’ hazar
uḌta hai ashk jaise sharara kabhi kabhi
Leave a Reply