Ummeed Fazli
haa.e ik shaḳhs jise ham ne bhulaya bhi nahin
yaad aane ki tarah yaad vo aaya bhi nahin
jaane kis moḌ pe le aa.i hamen teri talab
sar pe suraj bhi nahin raah men saaya bhi nahin
vaj.h-e-rusva.i-e-ehsas hua hai kya kya
haa.e vo lafz jo lab tak mire aaya bhi nahin
ai mohabbat ye sitam kya ki juda huun ḳhud se
koi aisa mire nazdik to aaya bhi nahin
ya hamen zulf ke saa.e hi men niind aati thi
ya mayassar kisi divar ka saaya bhi nahin
bar-ha dil tiri qurbat se dhaḌak uTTha hai
go abhi vaqt mohabbat men vo aaya bhi nahin
aap us shaḳhs ko kya kahiye ki jis ne ‘ummid’
gham diya gham ko dil-azar banaya bhi nahin
Leave a Reply