Jo Apne Ghar Ko Kaba Mante Hain

jo apne ghar ko ka.aba mānte haiñ

pas-e-dīvār phir kyuuñ jhāñkte haiñ

nahīñ tere junūñ par shak nahīñ hai

tirī aadat magar pahchānte haiñ

ye āzurda-jabīñ maazī ke baasī

na.e zaḳhmoñ pe yādeñ bāñdhte haiñ

tire ahl-e-yaqīñ sajdoñ meñ jhuk kar

mire kāfir tirā ġham māñgte haiñ

ridā-e-shab to abr-e-tar se bhīgī

chalo ik dhyān sar par tānte haiñ

sitāre zabt ke motī hazar ke

qabā-e-ārzū par Tāñkte haiñ

tirī khoTī hañsī par rone vaale

tirī āñkhoñ ke mausam jānte haiñ

Leave a Comment