Aisi Tashbih Faqat Husn Ki Badnami Hai

aisi tashbih faqat husn ki badnami hai

maah aariz ko likha khame ki ye khami hai

rang ye un ki sabahat ne ajab dikhlaya

surkh jode pe guman hota hai badami hai

kahte phirte ho bura mujh ko ye baat achchhi nahin

meri rusvai men sahab ki bhi badnami hai

aap ki baton se dil pak gaya jab kahta huun main

hans ke kahte hain ye ulfat ki faqat khami hai

chumta hai koi ankhon se lagata hai koi

hai libas aap ka ya jama-e-ehrami hai

nahin dagne ka qadam rah-e-vafa se apna

jo sitam chaho karo sabr mira haami hai

aap ki ishq ki iiza men hai lutf o rahat

aap par khatm miri jaan dil-arami hai

ham akele nahin rahte shab-e-tanhai men

yas-o-andoh-o-gham o hasrat-o-nakami hai

dil ko abru hain pasand aankh ko chashm-e-mai-gun

koi duniya men hilali hai koi jaami hai

lauh-e-quran jo kaha un ki jabin ko ‘zeba’

is men kuchh shak nahin tashbih ye ilhami hai