Shamsa Najm
mahshar men mil sakega sahara rasul ka
apna liya jo ham ne tariqa rasul ka
ik mo.ajiza tha zaat ka iman pe dalil
sab DhunDte rahe na tha saaya rasul ka
duniya bani usi ki bani us ki aḳhirat
kirdar men basa le jo taqva rasul ka
hai aarzu yahi ki madine ko ja sakun
aur dekhna nasib ho rauza rasul ka
gunji bilal ki na madine men jab azaan
ghaḌiyan thamin ki chup tha dulara rasul ka
har chiiz men tavakkul-o-taqva ki thi jhalak
jaama rasul ka ki bichhauna rasul ka
baḳhshish tabhi to ho jo shafa.at mile mujhe
va.ada ḳhuda ka par ho irada rasul ka
puuri ye ka.enat sitaron se hai bhari
sab se buland-baḳht sitara rasul ka
go hai gunahgar hai baḳhshish ki aas par
‘shamsa’ ko sirf ek sahara rasul ka
Leave a Reply