ḳhala ke darmiyani mausamon men
zamin hai asmani mausamon men
milenge ḳhak-zade raushni se
abad ke kahkashani mausamon men
hava.en phuul ḳhushbu dhuup barish
kisi ki har nishani mausamon men
mohabbat ke Thikane DhunDhti hai
badan ki la-makani mausamon men
anokhe za.iqe sulga rahi hai
lahu ki aag paani mausamon men
samundar aur hava ke bhed ‘nasir’
khulenge badbani mausamon men
Leave a Reply